ئىستانبولدا 8- قېتىملىق ياش تەتقىقاتچىلار ئىلمىي مۇھاكىمە يىغىنى ئېچىلدى 

ئۇيغۇر پوچتىسى، 24-نويابىر

ئامىنە سەدەف

5- نويابىر تۈركىيەنىڭ ھەرقايسى جايلىرىدىن كەلگەن ياش تەتقىقاتچىلار ئىستانبۇلدىكى ساباھىتتىن زايىم ئۇنىۋېرسىتېتىدا ئەھمىيەتلىك بىر ئۇچرىشىشتا جەم بولدى.

بۇ ئۇچرىشىش 8- قېتىملىق ياش تەتقىقاتچىلار ئىلمىي مۇھاكىمە يىغىنى بولۇپ، تۈركىيەنىڭ ھەرقايسى جايلىرىدىن كەلگەن ھەر ساھە، ھەر كەسىپتە ئىلگىرىلەۋاتقان ياش تەتقىقاتچىلار ئۆز كەسپى ساھەسىدە مول مەزمۇنلۇق تەتقىقات ماقالىلىرىنى ۋە دوكلاتلىرىنى سۇندى.

يىغىندا ئېچىلىش سۆزى قىلغان ئۇيغۇر ئاكادېمىيەسى ئالىي مائارىپ كومىتېتى مۇدىرى نامەتجان مەمەت ئورخۇن بۇ قېتىمقى يىغىننىڭ 2011- يىلىدىن باشلاپ قەرەللىك ئۆتكۈزۈلۈپ كېلىۋاتقانلىقىنى ۋە 2017- يىلى 7- قېتىملىقى ئۆتكۈزۈلگەندىن كېيىن توختاپ قالغان ياش تەتقىقاتچىلار ئىلمىي مۇھاكىمە يىغىنىنىڭ داۋامى ئىكەنلىكىنى، بۇ يىغىننىڭ تۈركىيەدىكى ئۇيغۇر ئاسپىرانتلار ۋە يېڭىدىن خىزمەتكە چىققان تەتقىقاتچىلار ئۈچۈن ئۆزلىرىنىڭ ئەسەرلىرىنى تونۇشتۇرۇش، پىكىر ئالماشتۇرۇش ۋە ئىلمىي تەتقىقات قىلىشنى ئۆگىنىش پۇرسىتى بىلەن تەمىنلەشنى مەقسەت قىلغانلىقىنى تەكىتلەپ ئۆتتى.

يىغىندا ئۇيغۇر ئاكادېمىيەسى مۇئاۋىن رەئىسى ۋە ئۇيغۇر ئاكادېمىيەسى ۋەخپە رەئىسى ئابدۇلھەمىد قاراخان ئۇيغۇر ئاكادېمىيەسى رەئىسى رىشات ئابباس ئەپەندىنىڭ سالىمىنى يەتكۈزۈش بىلەن بىرگە، 2011- يىلىدىن 2017- يىلغىچە قەرەللىك ئېلىپ بېرىلغان ئۇيغۇر ياش تەتقىقاتچىلار مۇھاكىمە يىغىنىنىڭ ۋەتەن سىرتىدا دوكتور ۋە ماگىستىرلىقتا ئوقۇۋاتقان ياشلارغا ئۆزىنى ئىپادىلەش پۇرسىتى يارىتىپ، قابىل ياشلارنىڭ ئوتتۇرىغا چىقىشىغا، شۇنداقلا، بۇ ياشلارنىڭ بىر قىسمىنىڭ شەرقىي تۈركىستان مۇستەقىللىق كۈرىشىنىڭ ئالدىنقى سەپلىرىدە خىزمەت قىلىشىغا سۇپا يارىتىپ بەرگەنلىكىنى ئەسكەرتىپ ئۆتتى. ئابدۇلھەمىد قاراخان سۆزىدە يەنە، بۇ تۈرلۈك خىزمەتلەرنىڭ سىستېمىلىق ئېلىپ بېرىلىشى ئۈچۈن دوسېنت نامەتجان ئەمەت ئورخون باشچىلىقىدا ئۇيغۇر ئاكادېمىيەسى ئالىي مائارىپ كومىتېتىنىڭ قۇرۇلغانلىقىنى ئېلان قىلدى.

بۇ قېتىمقى تەتقىقات يىغىنىدا ئوخشىمىغان كەسىپتىكى سەككىز ياش تەتقىقاتچى دوكتور بورھان ئۇلۇغيول، نۇرىددىن ئىزباسار ۋە مەمتىمىن بەگتىمۇر قاتارلىق ئۇستازلارنىڭ رىياسەتچىلىكىدە، ئۆزلىرىنىڭ ئالدىن تەييارلىغان ماقالىلىرىنى سۇندى.

بۇ مۇھاكىمە يىغىنىدا سۇنۇلغان ماقالىلەر:

1. ئۇيغۇرلاردا پىسخىكا ئېڭىنى يۇقىرى كۆتۈرۈشنىڭ زۆرۈرىيىتى (ئىلاھىيەت پەنلىرى تەتقىقاتچىسى كامىلە فازىل)
2. مولېكولا دەرىجىسىدە ياخشىلانغان گېلوكوسىداز ئاكتىپلىقى بىلەن يېڭى بىر بىئولوگىيەلىك ئىندىكاتور ئۈستىدە ئىزدىنىش (بىئولوگىيە پەنلىرى دوكتورى سۇلايمان ھاكىم)
3. خوتەن ئىسلام ھۆكۈمىتى: شەرقىي تۈركىستان سىياسىي سەھنىسى (تارىخ پەنلىرى ماگىستىرى رەھىمە تۇرسۇن)
4. كۆرۈنمەس ئازاب: سېستىرالىق كەسپىدە ئۆلۈم قايغۇسى بىلەن كۈرەش قىلىش (سېستىرا مۇكەررەم مۇھەممەتئىمىن)
5. شەرقىي تۈركىستان جەدىتچىلىك ھەرىكىتىنىڭ ئۇيغۇر ئەدەبىياتىغا كۆرسەتكەن تەسىرى (تۈركولوگىيە پەنلىرى ماگىستىرى سۈبھىنۇر ئۆمەرجان)
6. ئىككىنچى بىر تىل ئۆگىنىشتە ئانا تىلنىڭ رولى (ئىنگلىز تىلى ئوقۇتقۇچىسى مەريەم مۇختەر)
7. ئۇيغۇر تېبابىتىدە ئاق كېسەلنى داۋالاش ۋە كەلگۈسى يۈزلىنىشلەر (تېرە كېسەللىكلىرى تەتقىقاتچىسى، دوكتور ئابدۇلكەرىم ساتۇق بۇغرا)
8. توكتا توقۇلغان نىكېل ئوكسىد، نانو تالالارنىڭ دەرىجىدىن تاشقىرى باتارېيەلەردە قوللىنىلىشى (فىزىكا پەنلىرى ماگىستىرى رىزۋانگۈل ئابدۇللا)

ئامىنە سەدەف- ئۇيغۇر پوچتىسىنىڭ تۈركىيە ئ‍ستانبۇلدا تۇرۇشلۇق مۇخبىرى، ئۇ دىئاسپورا، ئۇيغۇر ئاياللىرى، مەدەنىيەت ساھەسدە يازىدۇ.