ئۇيغۇر پوچتىسى, 24-نويابىر
ھەبىبۇللا ئىزچى،
گوللاندىيەلىك رېژىسسور دايا كاھېن ئىشلىگەن «ماشىنىنىڭ كۆزى» ناملىق بۇ فىلىم 17-نويابىر گوللاندىيە پايتەختى ئامىستېردامدىكى ئايە تىياتىرخانىسىدا تۇنجى قېتىم قويۇلغان. مەزكۇر فىلىمنىڭ تونۇشتۇرۇلىشىدا: «’ماشىنىنىڭ كۆزى’ خىتاينىڭ نازارەت سىستېمىسى ۋە ئۇيغۇرلارغا قاراتقان باستۇرۇشى تونۇشتۇرىلىدۇ. ھازىر گوللاندىيەدە سۈرگۈندە ياشاۋاتقان، جازا لاگىرلىرىدا ئىشلەشكە مەجبۇرلانغان قەلبىنۇر سىدىق خانىمنىڭ كەچۈرمىشلىرى تەسۋىرلەنگەن بۇ فىلىمدە شەخسىي سۈرەتلەر، ساقلىۋېلىنغان ئۇچۇرلار، ئوچۇق مەنبەلىك سانلىق مەلۇماتلار، خىتاي دۆلەت تاراتقۇلىرىدا ئېلان مەلۇماتلار ۋە مۇھاجىرەتتىكى ئۇيغۇر شاھىتلارنىڭ گۇۋاھلىقلىرى ئارقىلىق، قەلبىنۇر سىدىقنىڭ شەخسىي گۇۋاھلىقى خىتاي دۆلىتىنىڭ تەشۋىقاتى بىلەن سېلىشتۇرۇلىدۇ» دېيىلگەن. بۇ فىلىمنىڭ تۇنجى قويۇلىشىدا تىياتىرخانا گوللاندىيەلىك كۆرۈرمەنلەر بىلەن لىق تولغان بولۇپ، فىلىم ئۇلارغا كۈچلۈك تەسىر قىلغان.
مەزكۇر فىلىم قويۇلۇشتىن بۇرۇن، گوللاندىيەنىڭ ئۈچ گېزىتىدە بۇ فىلىم ھەققىدە مەخسۇس خەۋەرلەر ئېلان قىلىنغان بولۇپ، قەلبىنۇر سىدىق خانىمنىڭ ۋەتەندىن قېچىپ چىققاندىن كېيىن، خەتەرگە قارىماي خىتاينىڭ ئۇيغۇرلارغا قاراتقان مىللىي تازىلاشقا شاھىت بولغانلىقىنى دۇنياغا ئاشكارىلاشنى ئۆزىنىڭ مەجبۇرىيىتى دەپ قارىغانلىقى بايان قىلىنىپ: «قەلبىنۇر سىدىق ‘ماشىنىنىڭ كۆزى’ ناملىق بۇ فىلىمدە ئۆزىنىڭ گۇۋاھلىقىنى سۈرەتلەر، ساقلىۋالغان ئۇچۇرلار ۋە ئوچۇق مەنبەلىك سانلىق مەلۇماتلار بىلەن بىرلەشتۈرۈپ، خىتاينىڭ زۇلۇم ماشىنىسىنى ئاشكارىلايدۇ. ئۇنىڭ شەرقىي تۈركىستاندا خىتاينىڭ ئۇيغۇرلارغا قاراتقان زۇلۇمى توغرىسىدا ھەقىقەتنى سۆزلەش ئۈچۈن تۆلىگەن بەدىلى ئىنتايىن زور بولغان، ئەمما ئۇ سۈكۈت قىلمىغان. ئۇ ئۇيغۇرلار ئارىسىدا چوڭ بولغان بىر ئۆبېك ئايال بولۇش سۈپىتى بىلەن، خىتاي دۆلىتىنىڭ ئۇيغۇر خەلقىنى يوقىتىش ئۈچۈن قوللانغان ئۇسۇللىرىنى ئۆز كۆزى بىلەن كۆرگەن.»
قەلبىنۇر سىدىق خانىم بۇ ھەقتە مۇنداق دىگەن: «مەزكۇر فىلىم، گوللاندىيەلىك دايا خانىم ھەمراھلىرى، مەن ۋە ئالېرىك ئىنىمىز بىلەن بىللە، 2023-يىلى نويابىردا، مېنىڭ ئۆيۈمدە باشلانغان بولۇپ، دايا خانىمنىڭ زور تىرىشچانلىقى ۋە توختىماي ئىزدىنىشى، كۆپ قېتىملاپ مېنىڭ ئۆيۈمدە سۆھبەتتە بولۇشى ئارقىلىق ۋۇجۇدقا چىققان. دايا خانىمنىڭ زور تىرىشچانلىقىغا كۆپ رەھمەت! ھازىرقىدەك بىزنىڭ دەۋايىمىز كۈن تەرتىپىدىن قېلىۋاتقان، تاجاۋۇزچى خىتاي ۋەتەنگە بېرىپ-كېلىش يولىنى ئېچىۋەتكەن، يەنە كېلىپ گوللاندىيەدە ۋەتەنگە بېرىپ-كېلىۋاتقانلارنىڭ سانى ئەڭ كۆپ بولۇشى يەتمىگەندەك، خىتاينىڭ تەشۋىقاتىنى كۈچەپ قىلىۋاتقان مۇشۇنداق بىر ۋاقىتتا، بۇ مېنىڭ گۇۋاھلىق فىلىمىمنىڭ ئىشلىنىپ ھەم مۇكاپاتقا ئېرىشىشى جىددىي بىر پەيتكە توغرا كەلدى. مىللىي دەۋايىمىزغا خەيرلىك بولغۇسى!»
مەزكۇر فىلىمنىڭ 17-نويابىردىكى تۇنجى قويۇلۇش مۇراسىمىغا دۇنيا ئۇيغۇر قۇرۇلتىيىنىڭ ۋەكىللىرىمۇ قاتناشقان.
ئىگىلىنىشىچە، مەزكۇر فىلىم 17-نويابىردىن باشلاپ كىنوخانىلاردا قويۇلىدىكەن.
Discover more from ئۇيغۇر پوچتىسى
Subscribe to get the latest posts sent to your email.
