ئىستانبۇلدا خىتاي قاچاقچىلىق تورى تارمار قىلىنغان

ئۇيغۇر پوچتىسى، 25-نويابىر

ھەبىبۇللا ئىزچى

تۈركىيە مەتبۇئاتلىرىنىڭ 22- نويابېردىكى خەۋىرىدە بىلدۈرۈلىشىچە، ئىستانبۇل ساقچىلىرى خىتاي جىنايەتچىلىرىنىڭ خەلقئارالىق قاچاقچىلىق تورىنى تارمار قىلغان.

 ئىستانبۇل ساقچى ئىدارىسى كۆچمەنلەر ۋە قاچاقچىلىقىغا قارشى تۇرۇش تارمىقى خەتەرلىك يۈكلەرنى تەكشۈرۈۋاتقاندا، يۈك تاق ئىچىدىن گۇمانلىق ئىككى پاسپورت يوشۇرۇنغانلىقىنى بايقىغان. تەكشۈرۈش نەتىجىسىدە، پاسپورتلارنىڭ ساختا ئىكەنلىكى ۋە شۇنىڭغا ئوخشاش ئۇسۇللار بىلەن تەييارلانغان نۇرغۇن ھۆججەتلەرنىڭ باشقا يۈك ئورالمىلىرىغا يوشۇرۇنغانلىقى ئاشكارىلانغان.

بۇ ۋەقەدە، خىتايلىق جىنايەتچىلەرنى تۈركىيە ئارقىلىق ئامېرىكىغا يۆتكەيدىغان، خىتاي تەرىپىدىن باشقۇرۇلىدىغان بىر قېچىش تورى تەشكىلاتى ئاشكارىلانغان. بۇ تەشكىلاتنىڭ ھەر بىر ئادەم ئۈچۈن 10 مىڭ دوللار ھەق بىلەن جىنايەتچى خىتايلارنى ئىستانبۇلغا ئېلىپ كىلىدىغانلىقى، ئاندىن ساختا ھۆججەتلەر ئارقىلىق باشقا دۆلەتلەرگە يولغا سالىدىغانلىقى ئېنىقلانغان بولۇپ، بۇ قاچاقچىلار تەشكىلاتىنى تەكشۈرگەندە، تۈرك تاتلىق يېمەكلىكلىرى، پوسۇلكىلار ۋە ھەتتا سۇ ئىستاكانلىرىغا يوشۇرۇنغان نۇرغۇن ساختا ھۆججەتلەر قولغا چۈشۈرۈلگەن.

ساقچىلار بۇ يۈكلەرنىڭ مەنبەسىنى تەكشۈرۈش ئارقىلىق يۈكنى ئېلىپ ماڭغان توشۇغۇچى مۇھەممەتئەلى قۇدرەت ئىسىملىك بىرەيلەننى قولغا ئالغان ۋە ئۇنى سوراق قىلغان. سوراق جەريانىدا مۇھەممەتئەلى قۇدرەت ئۇ يۈكنى ئىستانبۇلنىڭ ئارناۋۇتكۆي ناھىيەسىگە يېقىن بىر خىتاي ئەر-خوتۇندىن تاپشۇرۇۋالغانلىقىنى بىلدۈرگەن. ساقچىلار بۇنىڭغا ئاساسەن ئارناۋۇتكۆيدىكى بەلگىلەنگەن رايوننىڭ ئەتراپىنى قورشاپ تەكشۈرگەن.تەكشۈرۈشتە، خىتاي تەرىپىدىن باشقۇرۇلۇدىغان بىر خەلقئارالىق قاچاقچىلىق تەشكىلاتى پاش قىلىنىپ، 15 نەپەر خىتاي پۇقراسى قولغا ئېلىنغان ۋە نەق مەيداندىن ساختا دەپ قارالغان 27 دانە كىملىك ​​كارتىسى ۋە 58 دانە پاسپورت مۇسادىرە قىلىنغان.

تەكشۈرۈش جەريانىدا، بۇ قاچاقچىلىق تەشكىلاتى جازاغا ئۇچراش خەۋپى يۇقىرى بولغان ياكى غەرپ دۆلەتلىرىگە ۋىزا ئالالمىغان خىتاي پۇقرالىرىنى ھەر بىر ئادەم ئۈچۈن 10 مىڭ دوللاردىن پۇل ئېلىپ ئىستانبۇلغا ئەكىلىدىغانلىقى، بۇ يەردە ساختا ھۆججەتلەر ياساپ، بۇ خىتاي قاچقۇنلىرىنى ئەسلى پاسپورتلىرى بىلەن ئىسپانىيەنىڭ مادرىد شەھىرىگە يۆتكەيدىغانلىقى، ئاندىن مادىرد شەھرىدە خىتاي پاسپورتى ۋە ھۆججەتلىرىنى تاشلىۋېتىپ، ساختا پاسپورتلار بىلەن مېكسىكىغا ئېلىپ بارىدىغانلىقى، ئاخىرىدا مېكسىكىدىن ئامېرىكىغا پىيادە ئۆتكۈزۈدىغانلىقى ئاشكارىلانغان بولۇپ، نۆۋەتتە، بۇ تەشكىلاتنىڭ تۈركىيە ۋە ياۋروپادىكى شايكىلىرى جىددى تەكشۈرۈلمەكتە ئىكەن.