ئۇيغۇر پوچتىسى، 2-فېۋرال
تۈنۈگۈن لوس ئانجېلېستا ئۆتكۈزۈلگەن 68-نۆۋەتلىك گراممى مۇكاپاتىنى تارقىتىش مۇراسىمىدا، تىبەت روھانىي داھىيسى دالاي لاما ئۆزىنىڭ «تەپەككۇر: دالاي لاما جانابلىرىنىڭ ئويلىرى» (Meditations: The Reflections of His Holiness the Dalai Lama) ناملىق ئاۋازلىق كىتابى بىلەن «ئەڭ ياخشى ئۈنلۈك كىتاب ۋە ھېكايە بايان قىلىش» تۈرىدە تۇنجى قېتىم گراممى مۇكاپاتىغا ئېرىشتى.
دالاي لامانىڭ ئىنكاسى: «بۇ شەخسىي نەتىجە ئەمەس، بەلكى ئورتاق مەسئۇلىيەت»
مۇكاپاتتىن كېيىن، دالاي لاما ئىجتىمائىي تاراتقۇلاردا بايانات ئېلان قىلىپ، ئۆزىنىڭ بۇ مۇكاپاتنى «مىننەتدارلىق ۋە كەمتەرلىك» بىلەن قوبۇل قىلىدىغانلىقىنى بىلدۈردى. ئۇ سۆزىدە: «مەن بۇ مۇكاپاتنى شەخسىي بىر مۇۋەپپەقىيەت دەپ ئەمەس، بەلكى بىزنىڭ ئورتاق بولغان دۇنياۋى مەسئۇلىيىتىمىزنىڭ ئېتىراپ قىلىنىشى دەپ بىلىمەن،» دېدى.
ئۇ يەنە تىنچلىق، مېھرىبانلىق، مۇھىت ئاسراش ۋە ئىنسانىيەتنىڭ بىر گەۋدىلىك ئېڭىنىڭ يەر شارىدىكى 8 مىليارد پۇقرانىڭ ئورتاق پاراۋانلىقى ئۈچۈن ئىنتايىن مۇھىملىقىنى تەكىتلىدى. مەزكۇر ئاۋازلىق كىتاب ھىندىستانلىق كلاسسىك مۇزىكانت ئامجاد ئەلى خان ۋە ئۇنىڭ ئوغۇللىرى تەرىپىدىن ئىشلەنگەن مۇزىكىلار بىلەن بېزەلگەن.
خىتاينىڭ ئىنكاسى: «بۆلگۈنچىلىك ھەرىكىتى»
خىتاي ھۆكۈمىتى بۇ مۇكاپاتقا قارىتا دەرھال نارازىلىق ئىنكاسى قايتۇردى. دۈشەنبە كۈنى (2026-يىلى 2-فېۋرال)، خىتاي تاشقى ئىشلار مىنىستىرلىقىنىڭ باياناتچىسى لىن جيەن مەتبۇئات يىغىنىدا سۆز قىلىپ، دالاي لامانىڭ گراممى مۇكاپاتىغا ئېرىشكەنلىكىنى ئەيىبلىدى.
لىن جيەن دالاي لامانى «دىن تونىغا ئورىنىۋالغان، جۇڭگوغا قارشى بۆلگۈنچىلىك ھەرىكەتلىرى بىلەن شۇغۇللىنىۋاتقان سىياسىي سۈرگۈندى» دەپ سۈپەتلىدى. ئۇ خىتاينىڭ دالاي لامانىڭ بۇ خىل خەلقئارالىق پۇرسەتلەردىن پايدىلىنىپ «جۇڭگوغا قارشى پائالىيەتلەرنى قىلىشىغا» قەتئىي قارشى تۇرىدىغانلىقىنى بىلدۈردى.
دالاي لاما ئەنئەنىسى
تىبەت بۇددىستلىرى 1391-يىلى تۇغۇلغان روھانىي داھىينىڭ 14-قېتىملىق قايتا تۇغۇلغان گەۋدىسى دەپ قارايدىغان دالاي لاما، تىبەت رايونى خىتاي تەرىپىدىن قوشۇۋېلىنغاندىن بۇيان، تىبەت خەلقىنىڭ ھەق-ھوقۇقلىرى ئۈچۈن تىنچلىق يولى بىلەن كۈرەش قىلىپ كېلىۋاتقان ئەڭ ئابرۇيلۇق ئەرباب ھېسابلىنىدۇ.
بۇ قېتىملىق گراممى مۇكاپاتى دالاي لمانىڭ دۇنياۋى تەسىر كۈچىنىڭ سەنئەت ۋە مەدەنىيەت ساھەسىدىمۇ يۇقىرى ئىكەنلىكىنى يەنە بىر بار ئىسپاتلىدى.
ئۇيغۇر پوچتىسى دىن تېخىمۇ كۆپ مەزمۇنلارنى بايقاڭ
يېڭى يازمىلاردىن ئېلخەت ئارقىلىق خەۋەردار بولۇش ئۈچۈن مۇشتەرى بولۇڭ
