دىلنۇر رەيھان: ”ئۇيغۇر پوچتىسى“نىڭ كۈچلۈك، مۇستەقىل ۋە كەسپىي مېدىئا بولۇپ چىقىشىنى ئۈمىد قىلىمەن

دىلنۇر رەيھان (چېخىيە پەنلەر ئاكادېمىيەسى شەرقشۇناسلىق ئىنىستىتۇتى، ياۋروپا ئۇيغۇر ئىنىستىتۇتى)

دىئاسپورادىكى بىردىنبىر كەسپىي ئاخبارات ئورگىنى بولغان ”ئەركىن ئاسىيا رادىئوسى“ تاقالغاندىن كېيىن، ئۇيغۇر ئاخباراتچىلىقى ئاساسەن پالەچ ھالغا چۈشۈپ قالدى. ھالبۇكى، پۈتۈن دۇنيا ئارقا-ئارقىدىن يۈز بېرىۋاتقان مۇستەملىكىۋى ئۇرۇشلار ۋە ئىرقىي قىرغىنچىلىقلارغا پېتىۋاتقان ۋە ئۇيغۇر ئىرقىي قىرغىنچىلىقى دۇنيا ئاخباراتىدىن بارغانسېرى ئۆچۈۋاتقان مۇشۇنداق بىر خەلقئارالىق ئارقا كۆرۈنۈشتە، ئۆزىمىزنىڭ مۇستەقىل ۋە ھەقىقى مەنىدىكى كەسپى بىر ئاخباراتىنىڭ ئوتتۇرىغا چىقىشى ۋەزىيىتىمىزنىڭ تەقەززاسى بولۇپ قالدى. يېقىنقى يىللاردىن بېرى، تاھىر ئىمىن تەرىپىدىن قۇرۇلغان ئۇيغۇر ئاگېنىتلىقى ھەرخىل تىللاردا ئۇيغۇر ۋەزىيىتىنى دۇنياغا يەتكۈزۈپ كەلگەنىدى، نۆۋەتتە دىئاسپورادىكى غوللۇق زىيالىيلار ۋە ئەركىن ئاسىيا رادىئوسىنىڭ بىر قسم مۇنەۋۋەر مۇخبىرلىرىنىڭ قېتىلىشى بىلەن، ”ئۇيغۇر پوچتىسى“ نامىدا، كەسپىي بىر مېدىئا بولۇش مۇددىئاسى بىلەن ئوتتۇرىغا چىقتى. مەسئۇلىيەتچان، تەرەققىيپەرۋەر ۋە بىر ئەركىن دۆلىتىمىزنى ئارزۇلايدىغان بىر ئۇيغۇر زىيالىيسى بولۇش سۈپىتىم بىلەن، يېڭى قۇرۇلغان بۇ ئۇيغۇر مېدىئاسىنى چىن دىلىمدىن تەبرىكلەيمەن، تېز ئارىدا كۈچلۈك، مۇستەقىل ۋە كەسپىي بىر مېدىئا بولۇپ چىقىشىنى، ئۇيغۇر جەمئىيىتىدىكى ھەرقانداق بىر سەزگۈر ۋە تابۇ تېمىلاردىن قاچمايدىغان، زامان تەرەققىياتىغا لايىق ئەركىن ئاۋازىمىز بولالىشى ئۈچۈن ئالىي تىلەكلىرىمنى سۇنىمەن.