ھەبىبۇللا ئىزچى
يىللاردىن بېرى ئۇيغۇرلارنىڭ ئاۋازى بولۇپ كېلىۋاتقان تۈرك ژورنالىست يۈجەل تاناي ئەپەندى ئىستانبۇل جۇمھۇرىيەت باش سوتىنىڭ بىرىنجى دەرىجىلىك جىنايى ئىشلار سوت مەھكىمىسى تەرىپىدىن «ھاقارەت قىلىش جىنايىتى» بىلەن ئەيىبلىنىپ، بىر يىل سەككىز ئايلىق قاماق جازاسىغا ھۆكۈم قىلىنغان. ئۇ سوت قارارىنى 19-نويابىر تاپشۇرۇۋالغان بولۇپ، ئون كۈن ئىچىدە ئىستانبۇل جۇمھۇرىيەت باش سوتىغا ئۆزىنى مەلۇم قىلىپ جازانى قوبۇل قىلىشى كېرەكلىكى، ئەگەر ئون كۈن ئىچىدە ئۈزىنى مەلۇم قىلمىغاندا تۇتۇش بۇيرىقى چىقىرىلىدىغانلىقى ئۇقتۇرۇلغان.
يۈجەل تاناي ئەپەندى ئۇيغۇرلار ۋە شەرقىي تۈركىستان ھەققىدە كۆپلىگەن خەۋەر، ماقالىلەرنى ئېلان قىلغان بولۇپ، ئۇنىڭ ئىش-پائالىيەتلىرى خىتاينى قاتتىق بىئارام قىلغان. مەلۇم بولۇشىچە، يۈجەل تاناي 2020-يىلىنىڭ باشلىرى توردا «خىتاي كونسۇلخانىسى بىلەن تىل بىرىكتۈرگۈچى ‹خىتاي ئاياللار جەمئىيىتى›نىڭ رەئىسى مەۋلۇدە ئەزىز» دېگەن تېمىدا بىر ماقالە ئېلان قىلغان. تۈركىيە-خىتاي مۇھاجىر ئاياللار بىرلەشمىسىنىڭ رەئىسى مەۋلۇدە ئەزىز ، يۈجەل تاناي ئەپەندىنى بۇ ماقالىسى سەۋەبلىك، ئۇ ماقالىدە يۈجەل تاناينىڭ ئۆزىنى «خىتاي بىلەن تىل بىرىكتۈرگۈچى، خائىن، خىتاي جاسۇسى» دەپ ئاتىغانلىقىنى باھانە قىلىپ سوتقا كۆپ قېتىم ئەرز قىلغان. بۇ سوت بەش يىلغا يېقىن سوزۇلغان بولۇپ، دەسلەپتە يۈجەل تاناي ئەپەندىگە ئۇيغۇرلارنىڭ غەمگۈزارى مەرھۇم ئىلياس دوغان ئەپەندى ئادۋۇكاتلىق قىلغان بولۇپ، سوتنىڭ نەتىجىسى 19-نويابېر ئېلان قىلىنغان. بۇ ھەقتە يۈجەل تاناي ئەپەندىنىڭ ئادۋوكاتلىرى جازانىڭ تۈرمە سىرتىدا ئىجرا قىلىنىشى مۇمكىنلىكىنى بىلدۈرگەن.
زىيارىتمىزنى قوبۇل قىلغان يۈجەل تاناي ئەپەندى بۇ ئەرز-شىكايەت ھەرىكىتىنىڭ ئارقىسىدا خىتاينىڭ بىۋاسىتە قولى بارلىقىنى ئىلگىرى سۈرۈپ، «شەرقىي تۈركىستان داۋاسى مۇقەددەس بىر داۋا، بىز خىتاينىڭ چېگرا ھالقىغان باستۇرۇشىغا ئەسلا باش ئەگمەيمىز. بۇ جازا قارارى ۋە تۈركىيەدىكى خىتايپەرەسلەر ۋە ئۇنىڭ چاپارمەنلىرى بىزنىڭ ئاغزىمنى ، قەلىمىمنى ھەرگىزمۇ توختۇتالمايدۇ، شۇنداقلا بۇ جازا شەرقىي تۈركىستان داۋاسىغا بولغان ئىرادەمنى سۇندۇرالمايدۇ. شەرقىي تۈركىستان دەۋاسى مۇقەددەستۇر ۋە باش تارتىپ بولمايدىغان بۇرچىمىزدۇر» دېگەنلەرنى بىلدۈردى.
Discover more from ئۇيغۇر پوچتىسى
Subscribe to get the latest posts sent to your email.
