ئۇيغۇر پوچتىسى، 14-ئۆكتەبىر
OpenAI شىركىتى ChatGPT نى ئىشلىتىپ كەڭ كۆلەملىك ئىجتىمائىي تاراتقۇلارنى «نازارەت قىلىش» تەكشۈرۈشى ۋە مەخسۇس سۈنئىي ئىدىراك ئارقىلىق كۆزىتىش سىستېمىسى ئۈچۈن لايىھە ۋە تەشۋىقات ماتېرىياللىرىنى تۈزۈشكە ئۇرۇنغان بىر قانچە خىتايغا چېتىشلىق تەشكىلاتلارنىڭ ھېساباتىنى چەكلىگەن. شىركەتنىڭ ئەڭ يېڭى تەھدىت دوكلاتىدا تەپسىلىي بايان قىلىنغان بۇ ھەرىكەت، ئاممىۋى سۈنئىي ئىدىراك تېخنىكىسىنىڭ مەلۇم دۆلەتلەرگە قاراشلىق جاسۇسلۇق ۋە ئىز قوغلاش ھەرىكەتلىرى ئۈچۈن قانۇنسىز ئىشلىتىلگەنلىكىنى ئىسپاتلايدۇ.
OpenAI مۇنداق دېگەن: «بىز يەنە بىر ئىشلەتكۈچىنى چەكلىدۇق، ئۇ بەلكىم بىر ھۆكۈمەت ئورگىنىغا چېتىشلىق بولۇپ، ئۇ ChatGPTتىن ”يۇقىرى خەتەرلىك ئۇيغۇرلارغا چېتىشلىق ئېقىپ كىرىش ئاگاھلاندۇرۇش ئەندىزىسى“ (高危涉维吾尔关注人员流入预警模型) دەپ ئاتالغان بىر لايىھە يېزىش ھەققىدە ياردەم سورىغان. بۇ لايىھىدە قاتناش بېلەتلىرىنى تەھلىل قىلىدىغان ۋە ئۇلارنى ساقچى خاتىرىلىرى بىلەن سېلىشتۇرىدىغان بىر قورال تەسۋىرلەنگەن بولۇپ، بۇ ئارقىلىق ‘ئۇيغۇرلارغا چېتىشلىق ۋە يۇقىرى خەتەرلىك’ (باشقىچە ئېنىقلانمىغان بىر تۈر) دەپ تۈرگە ئايرىلغان كىشىلەرنىڭ ساياھەت ھەرىكەتلىرى توغرىسىدا بالدۇر ئاگاھلاندۇرۇش بېرىش كۆزدە تۇتۇلغان. بۇ ئىشلەتكۈچى بىزنىڭ ئەندىزىمىزدىن بۇ خىل قورالنى ياساشقا ياردەم سورىمىغان، بەلكى پەقەت ئومۇمىي لايىھە تۈزۈشكە ياردەم سورىغان؛ شۇڭا، بىز ئۇلارنىڭ قايسى تېخنىكىنى ئىشلەتمەكچى بولغانلىقىنى ياكى بۇ خىل قورالنىڭ خىتاي ھۆكۈمەت ئورگىنى تەرىپىدىن ئىشلىتىلگەنلىكىنى مۇستەقىل جەزملەشتۈرەلمەيمىز.»
«يۇقىرى خەتەرلىك ئۇيغۇرلارغا چېتىشلىق ئېقىپ كىرىش ئاگاھلاندۇرۇش ئەندىزىسى»نى تەرەققى قىلدۇرۇش -ئۇيغۇر شەخسلەرنىڭ ھەرىكىتى ۋە ئالاقىسىنى ئىز قوغلاش ئۈچۈن لايىھەلەنگەن. OpenAI نىڭ دۆلەت بىخەتەرلىكىگە خىلاپلىق قىلىش، جۈملىدىن كۆزىتىش ۋە يامان غەرەزلىك كودلارنى تەكشۈرۈش قاتارلىقلارغا قارشى تۇرۇش سىياسىتىگە ئاساسەن، بۇ ھېساباتلار دەرھال چەكلەندى، دېدى OpenAI.»
Hudson ئىنستىتۇتىنىڭ ئالى دەرىجىلىك تەتقىقاتچىسى مايكېل سوبولىك (Michael Sobolik) OpenAI نىڭ بۇ ھەرىكىتىنى قارشى ئېلىپ، «OpenAI نىڭ سۈنئىي ئىدىراكنىڭ دېموكراتىك ۋە جەمئىيەتكە ئالاقىدار تەسىرلىرىگە ئەستايىدىل مۇئامىلە قىلغانلىقىنى كۆرۈش كىشىگە ئۈمىد بېغىشلايدۇ» دېدى.
بۇ OpenAI نىڭ خىتاي دۆلىتىگە چېتىشلىق ھېساباتلارنى تۇنجى قېتىم چەكلەپ تاشلىشى ئەمەس، بۇ ئۇيغۇرلارنىڭ ئىزىنى قوغلاش ۋە باشقا شەكىلدىكى سىياسىي ۋە مىللىي كۆزىتىش ئۈچۈن چوڭ تىل ئەندىزىلىرىنى ئىشلىتىش ئۈچۈن قىلىنغان ئۇزۇنغا سوزۇلغان تىرىشچانلىقنى گەۋدىلەندۈرىدۇ.
Discover more from ئۇيغۇر پوچتىسى
Subscribe to get the latest posts sent to your email.
