ئىستانبۇلدا «خەلقئارا ئانا تىل كۈنى» مۇناسىۋىتى بىلەن مۇكاپاتلىق لېكسىيە سۆزلەش مۇسابىقىسى ئۆتكۈزۈلىدۇ

ئۇيغۇر پوچتىسى، 11-فېۋرال

ئىستانبۇل

ئۇيغۇر ئاكادېمىيەسىنىڭ بىلدۈرىشچە، «خەلقئارا ئانا تىل كۈنى» مۇناسىۋىتى بىلەن، ئۇيغۇر ياشلىرىنىڭ ئانا تىلدا راۋان سۆزلەش، ئەركىن تەپەككۇر قىلىش ۋە ئۆز ئىدىيەلىرىنى جەمئىيەتكە سۇنۇش ئىقتىدارىنى ئاشۇرۇش مەقسىتىدە مەخسۇس لېكسىيە سۆزلەش مۇسابىقىسى ئۇيۇشتۇرۇلغان. ئۇيغۇر ئانا تىل كومىتېتى، ئۇيغۇر ئاكادېمىيەسى ۋەخپى ۋە سەرخىللار مائارىپىنىڭ بىرلىكتە تەشكىللىشى بىلەن ئۆتكۈزۈلىدىغان بۇ پائالىيەت «سەھنە سىزنىڭ!» دەپ ناملانغان بولۇپ، نۆۋەتتە ماھىرلارنى تىزىملىتىش باشلانغان.

مۇسابىقە شەرتلىرى ۋە قاتنىشىش دائىرىسى

مۇسابىقىگە تولۇق ئوتتۇرا مەكتەپ، ئالىي مەكتەپ (باكلاۋۇر ۋە ماگېستىر) ئوقۇغۇچىلىرى شۇنداقلا جەمئىيەتتىكى بارلىق ياشلار قاتنىشىشقا تەكلىپ قىلىنىدۇ. قاتناشقۇچىلارنىڭ ئۆزى قىزىقىدىغان ياكى تەتقىق قىلغان ھەرقانداق ساھە بويىچە تېما تاللىشىغا رۇخسەت قىلىنغان بولۇپ، لېكسىيەنىڭ TEDx فورماتىدا، يېڭىچە كۆز قاراشلارغا باغلانغان ۋە ئاممىباپ بولۇشى تەلەپ قىلىنىدۇ.

مۇھىم ۋاقىت جەدۋىلى

مۇسابىقىگە قاتنىشىشنى خالايدىغانلار 2026-يىلى 2-ئاينىڭ 17-كۈنىگىچە تور ئارقىلىق تىزىملىتىپ، لېكسىيە ماۋزۇسى ۋە قىسقىچە مەزمۇنىنى سۇنۇشى كېرەك. تەشكىللىگۈچىلەر پائالىيەت سۈپىتىنى ساقلاش ئۈچۈن تېمىلارنى ئەستايىدىل تاللايدىغانلىقىنى، قوبۇل قىلىنغانلارغا 18-چىسلاغىچە جاۋاب بېرىلىدىغانلىقىنى بىلدۈرگەن. تاللانغان ماھىرلارنىڭ سۇنۇم (Power Point) ماتېرىياللىرىنى 19-چىسلا سائەت 17:00 گىچە ئەۋەتىپ بولۇشى شەرت قىلىنغان.

باھالاش ۋە مۇكاپاتلاش

ماھىرلارنىڭ لېكسىيەسى تۆۋەندىكى تۆت تەرەپتىن باھالىنىدۇ:

• ئىدىيەنىڭ يېڭىلىقلىقى ۋە قىممىتى.
• بايان قىلىش ماھارىتى ۋە تىلنىڭ راۋانلىقى.
• سەھنە ئىپادىسى ۋە يۈرۈش-تۇرۇشى.
• سۇنۇم ماتېرىياللىرى بىلەن نۇتۇقنىڭ ماسلىشىش ئۈنۈمى.

مۇسابىقىدە ئالدىنقى ئۈچ دەرىجىگە ئېرىشكەنلەرگە ئايرىم-ئايرىم ھالدا 7000 لىرا، 5000 لىرا ۋە 3000 لىرا نەق پۇل مۇكاپاتى بېرىلىدۇ.

پائالىيەت ئورنى ۋە ۋاقتى

مۇسابىقىنىڭ ھەل قىلغۇچ باسقۇچى 2026-يىلى 21-فېۋرال كۈنى ئىستانبۇل ساباھاتتىن زايىم ئۇنىۋېرسىتېتىنىڭ (IZU) İSEFAM Abdullah Tivnikli يىغىن سالونىدا ئۆتكۈزۈلىدۇ.

تەشكىللىگۈچى ئورۇنلار بۇ پائالىيەت ئارقىلىق ئۇيغۇر ياشلىرىنىڭ ئۆز-ئۆزىگە بولغان ئىشەنچىسىنى ئاشۇرۇش ۋە ئانا تىلدا يۇقىرى سەۋىيەلىك بىلىم ئالماشتۇرۇش مۇھىتى يارىتىشنى ئۈمىد قىلىدىغانلىقىنى تەكىتلىمەكتە.

جەدۋەلنى تۆۋەندىكى ئادرستىن كۆرەلەيسز:https://docs.google.com/forms/d/e/1FAIpQLSe5z7369JNiiiUx6UiMuuCzjEzev_B8hSm5lUd175ArYbLz9g/viewform