«قەلبىمدە سەنئەت»: ئالمۇتىدا ئۇيغۇر ياشلىرىنىڭ سەنئەت بايرىمى ئۆتكۈزۈلدى

ئاپتورى: زۇلفىيە مەسىمېلىيېۋا

«ئۇيغۇر ئاۋازى» گېزىتى

مۇھەررىردىن: مەزكۇر ماقالە قازاقىستاندا نەشر قىلىنىدىغان «ئۇيغۇر ئاۋازى» گېزىتىدە ئېلان قىلىنغان. «ئۇيغۇر پوچتىسى» ئوتتۇرا ئاسىيا ئۇيغۇرلىرىنىڭ ھاياتى ھەققىدە كەڭ دىئاسپورا جامائەتچىلىكىگە خەۋەر بېرىش ئۈچۈن، ماقالىنىڭ جۈملە قۇرۇلمىسى ۋە سۆز-ئاتالغۇلىرىنى ئورتاق ئەدەبىي تىل ئۆلچىمىگە يېقىنلاشتۇرۇپ، فورماتىنى تەڭشەپ قايتا ئېلان قىلدى. ئەسلى ئاپتور ۋە مەنبە ساقلاپ قېلىندى.

يېقىنقى مەزگىللەردىن بۇيان، سەنئەتكە ئىشتىياق باغلىغان ئوقۇغۇچىلار ۋە ياشلارنىڭ ئۆز تالانتلىرىنى نامايان قىلىشىغا پۇرسەت يارىتىپ بېرىدىغان بىر قاتار سەنئەت فېستىۋاللىرى ئۆتكۈزۈلمەكتە. بۇ جەھەتتە، «ئالامەت» ئىجادىيەت سەنئەت مەركىزىنىڭ مۇدىرى، جۇمھۇرىيەتلىك «شەبنەم» ئۇيغۇر ئىجادكار ئاياللار جەمئىيىتىنىڭ رەئىسى قەلبىنۇر ئارۇپنىڭ ئاكتىپ تەشكىللەش ئىقتىدارىنى ئالاھىدە تىلغا ئېلىشقا ئەرزىيدۇ.

يېقىندا پ. چايكوۋىسكىي نامىدىكى ئالمۇتا مۇزىكا ئىنىستىتۇتىنىڭ قوللىشى بىلەن ئۆتكۈزۈلگەن «قەلبىمدە سەنئەت» كۆرىك-فېستىۋالى ئەنە شۇنداق ئەھمىيەتلىك پائالىيەتلەرنىڭ بىرى بولدى. ئۇيغۇر «ئون ئىككى مۇقام»ىنى تەرتىپكە سالغۇچى مەشھۇر سەنئەتكار ئاماننىساخان نامىغا بېغىشلانغان بۇ نۇپۇزلۇق ناخشا-مۇزىكا مۇسابىقىسى مىللىي چالغۇ ئەسۋابلار، سەھنە ماھارىتى ۋە ئۇسسۇل قاتارلىق يۆنىلىشلەر بويىچە ئېلىپ بېرىلدى. پائالىيەتكە ئالمۇتا ۋە ياركەنت شەھەرلىرى، شۇنداقلا ئۇيغۇر ۋە ئەمگەكچى قازاق ناھىيەلىرىدىن كەلگەن 300 گە يېقىن ئوقۇغۇچى قاتناشتى.

فېستىۋالنىڭ تەننەتنىلىك ئېچىلىش مۇراسىمىدا، ئىنىستىتۇت ئوقۇغۇچىلىرى ئۆز ماھارەتلىرىنى كۆرسىتىپ، كۆرۈرمەنلەرنىڭ قىزغىن ئالقىشىغا ئېرىشتى. ناخشا ۋە مىللىي چالغۇ ئەسۋابلار ماھارىتى باسقۇچى تاماملانغاندىن كېيىن، مېھمانلارغا سۆز نۆۋىتى بېرىلدى. شەھەرلىك مۇزىكا ئىنىستىتۇتىنىڭ ئوقۇتقۇچىسى قانىبېك ئاسىلبېكۇلى سۆز قىلىپ، قاتناشقۇچىلارغا ئىللىق تىلەكلىرىنى بىلدۈردى ۋە ئۇلارنىڭ كەلگۈسىگە ئۇتۇق تىلىدى.

جۇمھۇرىيەتلىك ئانىلار كېڭىشىنىڭ رەئىسى زورام ئاۋۇتوۋا خانىم پائالىيەت ھەققىدە توختىلىپ مۇنداق دېدى:

«بۈگۈنكى سەنئەت كۆرىكىگە قاتناشقىلى كەلگەن ياش تالانتلارنى كۆرۈپ، ئەۋلادلىرىمىزنىڭ خەلقىمىز سەنئىتىگە، مەدەنىيىتىگە ۋە تارىخىغا بولغان مۇھەببىتىنىڭ چەكسىز ئىكەنلىكىنى ھېس قىلدۇق. چۈنكى ئۇلار ھەر بىر ناخشىنىڭ مەنىسىنى چوڭقۇر چۈشىنىپ، مىللىي چالغۇلار بىلەن يۇقىرى سەۋىيەدە ئورۇنداپ چىقتى. سۆزلەرنىڭ ئېنىق تەلەپپۇز قىلىنىشى ۋە ئاۋاز دائىرىسىنىڭ كەڭلىكى ئۇلارنىڭ سىستېمىلىق تەييارلىق بىلەن كەلگەنلىكىنى كۆرسىتىپ تۇرۇپتۇ.»

مۇسابىقە جەريانىدا، تالانتلىق ياشلار ئانا-ۋەتەن، ئاتا-ئانا ۋە ئائىلە تېمىلىرىغا بېغىشلانغان، مەزمۇنى چوڭقۇر ناخشىلارنى ئورۇندىدى. «دوستلۇق»، «سەبدە»، «غۇنچە» ۋە «خۇش ناۋا» قاتارلىق مىللىي چالغۇلار ئانسامبىللىرى خەلق ناخشىلىرى ۋە «ئون ئىككى مۇقام» تەركىبىدىكى پارچىلارنى ياڭراتتى. پائالىيەت ئاخىرىدا، بىر قىسىم تەشكىلات رەھبەرلىرى تەرىپىدىن ئانسامبىل يېتەكچىلىرىگە تەشەككۈرنامىلەر ۋە پەخرىي ناملار تەقدىم قىلىندى.

سەھنە ماھارىتى يۆنىلىشىدە، كىچىك ئاقسۇ يېزىسىدىن كەلگەن ئوقۇغۇچىلارنىڭ قازاق خەلقىنىڭ مەشھۇر شائىرى مۇقائالى ماقاتايېۋنىڭ «ئاققۇلار ئۇيقۇدا» ناملىق ئەسىرى ئاساسىدا تەييارلىغان تىياتىرى كۆرۈرمەنلەردە ئالاھىدە تەسىرات قالدۇردى.

ئۇسسۇل باسقۇچىدا بولسا، يەككە ۋە گۇرۇپپا ئۇسسۇللىرى ئايرىم باھالاندى. ئەلمىرا سەيدۇللائېۋا، رەھمەتجان يولداشېۋ ۋە نازۇگۇم تېيىپوۋا قاتارلىق تەجرىبىلىك ئۇسسۇل ئۇستازلىرى باھالاشقا قاتناشتى. «ئەۋلاد»، «ئەسەل»، «بارنا»، «مالىكا»، «ئاماننىسا شوۇ»، «دىلناز»، «فىئېستا» ۋە «ئىرادە» قاتارلىق ئانسامبىللار، شۇنداقلا «رۇخسارە» ۋە «كەلەچەك» ئۇسسۇل ستۇدىيەلىرى يۇقىرى ماھارەت كۆرسىتىپ، باھالىغۇچىلارنىڭ يۇقىرى باھاسىغا ئېرىشتى.

پائالىيەت ئاخىرىدا، مۇسابىقىگە قاتناشقان ھېچقانداق ماھىر قۇرۇق قول قايتۇرۇلمىدى. غالىبلارغا ئالاھىدە لوڭقىلار ۋە قىممەتلىك سوۋغىلار بېرىلدى. شۇنداقلا، ئانسامبىل يېتەكچىلىرىگە «شەبنەم» جەمئىيىتىنىڭ «مەدەنىيەت ئەلچىسى» مېدالى تاپشۇرۇلدى.

تەشكىللىگۈچى قەلبىنۇر ئارۇپ سۆز ئېلىپ، پائالىيەتنى قوللىغان بارلىق جەمئىيەت ئەزالىرىغا، ئادىل باھالىغان ھەيئەتلەرگە ۋە رىياسەتچى ئىرادە مەمتكە ئالاھىدە رەھمەت ئېيتتى.

«قەلبىمدە سەنئەت» فېستىۋالى ئۇيغۇر ياشلىرىنىڭ سەنئەتكە بولغان ئىشتىياقىنى ۋە ئىجادىيەت يوشۇرۇن كۈچىنى يەنە بىر قېتىم نامايان قىلدى. بۇ پائالىيەت پەقەت بىر مۇسابىقىلا بولۇپ قالماستىن، بەلكى ياش تالانتلارنى قوللايدىغان ۋە ئۇلارنىڭ ئۆز-ئۆزىگە بولغان ئىشەنچىسىنى ئاشۇرىدىغان مۇھىم سۇپا بولۇپ قالدى.