ئارفىيە ئېرىنىڭ ياپونىيە پارلامېنتىدىكى ئۈچىنچى زەپىرى:   لىبرال دېموكراتىيە پارتىيىسى ئۈستۈنلۈكنى ئىگەللىدى

ئۇيغۇر پوچتىسى، 8-فېۋرال

ئەسلى نەسەبى ئۇيغۇر ۋە ئۆزبەك بولغان ئارفىيە ئېرى، ياپونىيەنىڭ چىبا 5-رايونى (ئىچىكاۋا ۋە ئۇراياسۇ شەھەرلىرى) دىن لىبرال دېموكراتىيە پارتىيىسىگە ۋاكالىتەن سايلامغا قاتناشتى. گەرچە سايلام جەريانىدا ياپونىيەنىڭ نۇرغۇن جايلىرىدا قاتتىق قار يېغىپ تۇرسىمۇ، ئەمما سايلىغۇچىلار ئارفىيەنىڭ ئاكتىپ خىزمەتلىرىگە يۇقىرى باھا بېرىپ، ئۇنى قايتا سايلىدى.

ئارفىيە ئېرى جورج تاۋن ئۇنىۋېرسىتېتىنى تاماملىغاندىن كېيىن، ياپونىيە بانكىسى ۋە بېرلەشكەن دۆلەتلەر تەشكىلاتىدا خىزمەت قىلغان. ئۇنىڭ خەلقئارا تەجرىبىسى ۋە يەتتە خىل تىلنى پۇختا بىلىشى ئۇنى ياپونىيە دىپلوماتىيە ساھەسىدىكى مۇھىم شەخسكە ئايلاندۇردى. ئۇ ئالدىنقى نۆۋەتلىك كابىنېتتا تاشقى ئىشلار مىنىستىرلىكىنىڭ مۇئاۋىن مىنىستىرى بولۇپ ئىشلىگەن ئىدى.

ئارفىيە ئېرىنىڭ ئاساسلىق سىياسىي پوزىتسىيەسى ۋە پىلانلىرى

ئارفىيە ئېرى بۇ قېتىملىق سايلامدا ئۆزىنىڭ سىياسىي نىشانلىرىنى تۆۋەندىكىدەك بىر قانچە چوڭ تېمىغا مەركەزلەشتۈرگەن:

1. يەرلىك ئىقتىساد ۋە تۇرمۇش سۈپىتىنى ئاشۇرۇش:

• مال باھاسىنى تىزگىنلەش: ئېنېرگىيە، گاز ۋە كۈندىلىك تۇرمۇش بويۇملىرىنىڭ باھاسىنىڭ ئۆرلەپ كېتىشىگە قارشى جىددىي تەدبىرلەرنى قوللىنىش.
• بالا تەربىيىلەشكە ياردەم: نوپۇسنىڭ ئازىيىشى ۋە قېرىشىغا قارىتا، ياش ئائىلىلەرگە بېرىلىدىغان ياردەم پۇل ۋە مائارىپ پاراۋانلىقىنى كۈچەيتىش.
• ئىنفرا قۇرۇلۇش: رايوننىڭ قاتناش قىستاڭچىلىقىنى ھەل قىلىش ۋە تەبىئىي ئاپەتلەرگە (مەسىلەن، يەر تەۋرەش) تاقابىل تۇرۇش ئىقتىدارىنى ئۆستۈرۈش.

2. دۆلەت مۇداپىئەسى ۋە دىپلوماتىيەنى كۈچەيتىش:

• كۈچلۈك ياپونىيە: ياپونىيەنىڭ مۇداپىئە ئىقتىدارىنى تۈپتىن كۈچەيتىش ۋە ئاخبارات ئىقتىدارىنى ئۆستۈرۈش.
• ئامېرىكا-ياپونىيە ئىتتىپاقى: ئامېرىكا بىلەن بولغان مۇناسىۋەتنى تېخىمۇ چوڭقۇرلاشتۇرۇش ۋە قىممەت قارىشى ئورتاق دۆلەتلەر بىلەن بولغان ھەمكارلىقنى كۈچەيتىش.
• كىشىلىك ھوقۇق دىپلوماتىيەسى: خەلقئارا سەھنىدە كىشىلىك ھوقۇق ۋە دېموكراتىيە قىممەت قارىشىنى ئىلگىرى سۈرۈش.

3. ئىقتىسادىي ئىسلاھات:

• باجنى كېمەيتىش: كىرىم بېجىنى كېمەيتىش ۋە بېنزىن بېجىنى تەڭشەش ئارقىلىق خەلقنىڭ يۈكىنى يېنىكلىتىش.
• تېخنىكىلىق يېڭىلىق: ياپونىيەنىڭ رەقەملىشىش ۋە يېڭى تېخنىكا ساھەسىدىكى رىقابەت كۈچىنى ئاشۇرۇش.

لىبرال دېموكراتىيە پارتىيىسىنىڭ غەلىبىسى ۋە يېڭى ھۆكۈمەت

بۇ قېتىملىق سايلامدا لىبرال دېموكراتىيە پارتىيىسى (LDP) 465 ئورۇندىن 274 تىن 328 گىچە ئورۇنغا ئېرىشىپ، پارلامېنتتا يالغۇز ئۆزىلا كۆپ سانلىقنى ئىگىلىدى. ياپونىيەنىڭ تۇنجى ئايال باش ۋەزىرى سانا ئې تاكائىچى نىڭ يۇقىرى ئابرويى پارتىيەنىڭ زور غەلىبە قىلىشىدىكى تۈرتكىلىك ئامىل بولدى.

تاكائىچى ھۆكۈمىتىنىڭ بۇ غەلىبىسى ياپونىيەنىڭ تاشقى سىياسەتتە تېخىمۇ قاتتىق پوزىتسىيە تۇتۇشى، بولۇپمۇ خىتايغا قارىتا مۇداپىئەنى كۈچەيتىش ۋە تەيۋەن مەسىلىسىدە ئاكتىپ بولۇشىدىن بېشارەت بەرمەكتە.

ئارفىيەنىڭ مۇۋەپپەقىيتى

ئارفىيە ئېرىنىڭ ئۈچىنچى قېتىم سايلىنىشى پەقەت ئۇنىڭ شەخسىي مۇۋەپپەقىيىتىلا ئەمەس، بەلكى ياپونىيە سىياسىتىنىڭ تېخىمۇ كۆپ خىللىققا ۋە ياشلارنىڭ ئاۋازىغا ئەھمىيەت بېرىۋاتقانلىقىنىڭ سىمۋولىدۇر.

ئۇنىڭ قىزىقىشى ئېغىرلىق كۆتۈرۈش مەشىقى بولۇپ، ئۇ خىزمەتلىرىنىڭ ئالدىراشلىقىغا قارىماي، جىسمانىي كۈچىنى ساقلاش ئۈچۈن تىرىشىپ مەشىق قىلىدۇ. ئۇنىڭ شۇئارى: ”چىدامچانلىق — كۈچتۇر.“ ئارفىيە ئۆزى ھەققىدە مۇنداق دەيدۇ: ”كىشىلەر مېنى پەقەتلا خىزمەتكە بېرىلگەن، مۇۋەپپەقىيەت قازانغان بىر ئايال دەپ ئويلايدۇ، ئەمما مەن بۈگۈنكى بۇ ئورۇنغا جاپالىق تىرىشچانلىق، چىدامچانلىق ۋە يولۇققان نۇرغۇن مەغلۇبىيەتلەرنى يېڭىش ئارقىلىق يېتىپ كەلدىم.“»